Introducción

1997ko uztailean hiri hondakinak biltzeko eta kale-bideak garbitzeko zerbitzuak bere gain hartu zituenetik, Servicios de Txingudi - Txingudiko Zerbitzu Mankomunitateak hausnarketa sakon bat egin zuen bere gestio-erakundearen bidez hiri hondakinen egoerari buruz, haien kudeaketa osoa egoki eta Europako Batasuneko direktibek udalen eskuduntzen esparruan bideratu dituzten kudeaketa-eredu aurreratuenen ildotik bideratzearren.

Egoeraren azterketa abiapuntutzat harturik, direktiba horiek era hoberenean betetzeko aukera emango liguketen bitartekoak egokitzearren, helburu batzuk zehaztu eta haien aldeko egitarau batzuk hartu genituen aintzat. Egoera hura goitik behera aldatuko zuten egitarauak ziren guztiak eta lehentasunak zehaztu behar ziren epe jakin batzuetan.

Hiriko eta antzeko hondakinen kudeaketa integralaren kontzeptuak, gai desberdinetatik sorturiko hondakinen bilketa egokia ez ezik, haien garraioa ere, tratatu edo sailkatu egingo diren zentro bateraino, kontuan hartu behar duenez. agerian gelditu zen gure eskualdean hondakinak bildu, sailkatu eta tratatuko diren azpiegituren alorrean dagoen defizit handia.

Hondakinak egunoro sortzen direnez, Servicios de Txingudi - Txingudiko Zerbitzuek hirialdean, industria eta landa-eremuetan sorturiko kasuistika guztiei egoki erantzungo dien bilketa-eredu moderno, bizkor eta eraginkor baten diseinu lehenetsi zuen aurreneko fasean. Halatan, hondakinen bilketa-sistema moderno bat abiarazi zuen 1999ko ekainean, eta programa informatiko berri batetik abiatuta planifikatu eta kontrolatu zituen edukiontzien ratioak, hobekuntza nabaria ekarriz lanaren alor horretara.

Bilketa-jarduera sendotu eta gero, hondakinak bildu, sailkatu eta tratatuko diren oinarrizko azpiegituren hornikuntzari ekin genion bigarren fase batean, Gipuzkoako Lurraldeko Foru Aldundiak 1995ean prestatu zuen Plan Integrala zaharkitua baitzen ordurako. Gainera, San Markosko zabortegia erabat betetzear zegoen ordurako, eta zabortegi hori da gure hondakinen %80ren jomuga.

Oinarrizko kudeaketarako diseinua zehaztu, eta askitasun eta hurbiltasun printzipio europarrak bere dinamikaren funtsezko ardatz bihurturik, Servicios de Txingudi - Txingudiko Zerbitzuek hiru proiektu agindu ditu hondakinen sortzaileek euskarri estruktural bat eduki dezaten. Proiektu hauetan hondakinen biltegi alternatibo bat -garbigune bat-, industria hondakin geldoentzako zabortegi bat, eta hiriko eta antzeko hondakinak tratatzeko zentro bat aurreikusi dira.

Hondakinak tratatzeko zentroaren eta haren inguruan dauden aukera desberdinen konplexutasunari, gehitu egin behar zaio, gure aldetik, aintzat hartu beharreko lan-eremua Txingudiko Badiaren inguruko udalerri guztietara zabaldu beharrak dakarren konplexutasuna, Hendaiako udalerrira ere zabaldu behar baita Plan honen ekinbidea. Horrenbestez, Ingurugiroaren Babes eta Garapenerako alorrean espezializaturiko enpresa bati eskatu zaion azterketa hau, haren denbora-epea 2016. urtean mugatuz. Aldi horretara mugatuko da bideratuko den tratamendua, baina kontuan hartu behar da hori dela Zabortegiratzeen Direktibak zehaztu duen epea.

Mandatu horren emaitza da ondoan datorren Txingudi Eskualdeko Hiri Hondakinen Plan Integral hau.